Kelda: Kvf.fo
Hitapumpur skulu nú undir somu treytir sum jarðhitaskipanir. Lógin um jarðhita skal eisini galda fyri hitapumpur. Tað er kjarnin í lógarbroytingum, sum Innlendismálaráðið hevur orðað og sent til hoyringar.
Nú verður eisini kravt, at tey, sum seta upp hitapumpur, hava løggilding, at tey eru góðkend at gera slíkt arbeiði. Fyri at fáa slíka góðkenning krevst skeið, sum varar nakrar dagar.
Og myndugleikin, Umhvørvisstovan, skal eisini hava upplýsingar um aðrar hitipumpuskipanir enn bara jarðhitaskipanir.
Gott er at vita, hvussu hús og bygningar eru hitað, tí hagtøl skulu vera um upphiting, stendur í viðmerkingunum um lógaruppskotið.
Sambært orkupolitikki landsstýrisins skal í minsta lagi helvtin av sethúsum og bygningum verða hitað við varandi orkukeldum í 2025.
Og nýggju reglurnar skula takast í álvara, tí tey, sum sambært galdandi lóg fáa sekt fyri at bróta lógina um jarðhita, fáa nú eisini sekt, bróta tey lógina um hitapumpur.
Hitapumpur, sum eru minni enn fýra kiloWatt, eru undantiknar flestu krøvunum í lógaruppskotinum.